April 28, 2017 at 10:01AM

【磁力共振與渴睡症】 話說我上星期去了照磁力共振，我先至發現原來照磁力共振對於我嚟講都係一件幾困難嘅事。我估我自己以前應該冇照過，但可能照過腦掃描都唔定（都係訓喺度推入一個好大既圓形）。 我今次照膝頭，大概要照半個鐘左右，而照緊磁力共震嗰陣時，係要訓低唔可以郁嘅，試問我訓喺度半個鐘唔郁有乜可能唔會訓著呢？唔好話幾分鐘，幾秒鐘我都可能訓著啦！咁訓著又如何呢？問題係部份渴睡症既患者會喺瞓覺嘅時候，手腳會間中郁動，甚至會跟隨夢景去郁（俗稱「訓覺打交」，咁當然唔係真係打交，比喻黎既，除非夢景係MMA啦），咁即係話我唔訓得啦……… 開頭照左唔知幾多分鐘，我都仲頂得順，但真係好悶。部機器雖然好鬼嘈，但佢發出千篇一律既聲音，真係令人好想訓。結果我當然頂唔順訓著左，然後隻腳郁左幾下（雖然已經有個細圈固定），跟住醫生就叫我頂住唔好訓，郁動有機會令影象唔清晰要再照過。 但係唔訓都好難唔郁，因為部份渴睡症患者趟下未瞓著時，有時手腳都會間中郁動，最慘係當我越專注嘗試控制膝頭唔郁，佢就越有機會郁（同時我就越不安），唔理佢就反而未必會郁（或者其實係郁左唔知），然後醫生又叫我盡量唔好郁。喺呢黎不知所措既情況下又捱了十多分鐘，終於照完了，如釋重負啊…… #磁力共振 #MRI #手腳郁動 #訓覺打交