2017年4月28日星期五
April 28, 2017 at 10:01AM
【磁力共振與渴睡症】 話說我上星期去了照磁力共振，我先至發現原來照磁力共振對於我嚟講都係一件幾困難嘅事。我估我自己以前應該冇照過，但可能照過腦掃描都唔定（都係訓喺度推入一個好大既圓形）。 我今次照膝頭，大概要照半個鐘左右，而照緊磁力共震嗰陣時，係要訓低唔可以郁嘅，試問我訓喺度半個鐘唔郁有乜可能唔會訓著呢？唔好話幾分鐘，幾秒鐘我都可能訓著啦！咁訓著又如何呢？問題係部份渴睡症既患者會喺瞓覺嘅時候，手腳會間中郁動，甚至會跟隨夢景去郁（俗稱「訓覺打交」，咁當然唔係真係打交，比喻黎既，除非夢景係MMA啦），咁即係話我唔訓得啦……… 開頭照左唔知幾多分鐘，我都仲頂得順，但真係好悶。部機器雖然好鬼嘈，但佢發出千篇一律既聲音，真係令人好想訓。結果我當然頂唔順訓著左，然後隻腳郁左幾下（雖然已經有個細圈固定），跟住醫生就叫我頂住唔好訓，郁動有機會令影象唔清晰要再照過。 但係唔訓都好難唔郁，因為部份渴睡症患者趟下未瞓著時，有時手腳都會間中郁動，最慘係當我越專注嘗試控制膝頭唔郁，佢就越有機會郁（同時我就越不安），唔理佢就反而未必會郁（或者其實係郁左唔知），然後醫生又叫我盡量唔好郁。喺呢黎不知所措既情況下又捱了十多分鐘，終於照完了，如釋重負啊…… #磁力共振 #MRI #手腳郁動 #訓覺打交
2017年4月21日星期五
April 21, 2017 at 09:21AM
兩日一夜既睡眠檢查昨天終於完成了，要離開呢個對我人生很重要又充滿有趣回憶地方啦～～～ 【第三次睡眠檢查之後感】 （一）地方和十幾年前無乜點變，但冷氣仍舊咁鬼凍。下次要穿長褲同毛毛拖鞋。 （二）儀器細了很多，以前做小睡測試要前往指定房間用好大座既儀器，而家部機縮細到腰包咁細，唔使換房方便好生。以前嗰間房好似仲健在。 （三）朝早起身唔使抽血，唔使「拮手背」。同埋原來血管幼細難抽血，除了和肥胖有關之外，同無做運動都有關的。 （四）好多謝睡眠檢查室內每位醫護人員對我的照料和忍耐我每事問既性格，包括服務多年兼友善既林姑娘、外表好cool但都識笑既Hazel、經常面帶笑容既Claire、健談開朗兼細心既Cherry、好多野講兼反社會既Tammy、傳說中慢左起身要開窗簾既Yannis、笑容可親服務滿分既蓮姐^^ 期待下次有機會再見大家～～～ #睡眠檢查 #SleepLab
2017年4月19日星期三
April 19, 2017 at 05:53PM
【再做睡眠檢查初感】 （一）十幾版問卷十幾年都無變，做到呆左…… （二）冷氣超凍……好似雪房咁 （三）仍是掛念以前的醫院膳食，即刻整之餘，又有橙汁同生果，唔似得而家得個飯盒……不過今次都比上次嗰個好食 （四）唔知點解呢度唔少既醫生（定學生？）都係靚女？定係咁啱呢？以前都唔覺
April 19, 2017 at 12:44AM
接近一個月無新帖，唔係因為我無恰眼訓或者無野想些牙，而是因為我呢排實在太懶……😅 話說醫院約了我明天做兩日一夜既睡眠檢查，今晚唔知會否緊張到訓唔著呢？
訂閱：
文章 (Atom)